Woordeboek van Afrikaans Vandag

KI afk. kunsmatige intelligensie: › Maar wat is KI? Daar is talle definisies, maar basies verwys die term na die vermoë van rekenaars om menslike intelligensie te simuleer. Rekenaars word geprogrammeer deur gebruik te maak van komplekse en gesofistikeerde algoritmes. Die resultaat is rekenaarstelsels wat veronderstel is om te dink soos die mens en menslike eienskappe (soos om te kan leer, logies te kan dink en probleme te kan oplos) besit. Dit beteken dat die rekenaar poog om die menslike brein te simuleer deur die vermoë om te leer en te ontleed (prof. Basie von Solms, Netwerk24, 27 Mei 2021).
◌ ENGELS: artificial intelligence | AI

› generatiewe KI [afkorting GKI] kunsmatige intelligensie wat die vermoë het om nuwe, oorspronklike inhoud te genereer, te ontwikkel, te skep, voort te bring, deur patrone in bestaande data te analiseer en te leer: › Met behulp van GKI kan teks gegeneer, beelde geskep en musiek gekomponeer word. › Die gebruik van Kl is selfs meer transformerend as die koms van selfone. Dit kan vergelyk word met die koms van die internet, [...]  Daar gaan nuwe maatskappye kom wat generatiewe Kl gaan gebruik om sakemodelle te ontwrig in die ruimte waarin hulle sake doen (Francois Williams, Netwerk24, 28 Junie 2023).: › Elon Musk maak glo gereed om in die mark vir generatiewe kunsmatige intelligensie (Kl) in te spring met sy eie weergawe van ChatGPT (Beeld, 18 April 2023).

samestelling(s):
KI-enjin: › Die KI-enjin [...] is ’n ontsettende kragtige soekenjin wat groot korpusse ongestruktureerde teks op webskaal kan analiseer. In die praktyk word meer as 250 000 000 URL’e per dag verwerk en uit vyftien verskillende tale vertaal (Wiida Fourie Basson, US-nuus, 10 Maart 2023).
KI-etiek
KI-gegrond: › KI-gegronde tegnologie
KI-instituut
KI-karakter
KI-kletsbot
KI-laboratorium
KI-model: › Parameters van ’n KI-model beheer die grootte en vooroordeel van bane tussen die model se neurone wat uit opleidingsdata geleer word. Dink aan hulle as die model se interne veranderlikes wat vorm aan sy aksies en doeltreffendheid gee (Wessel van Rensburg, Vrye Weekblad, 26 April 2024).
KI-stelsel: › Oor die wêreld heen is lande en organisasies besig om te werk aan formele riglyne om die ontwikkeling van KI-stelsels te reguleer [...] KI-stelsels wat in die kategorie van onaanvaarbare risiko’s val, mag byvoorbeeld glad nie in die EU ontwikkel of toegepas word nie (prof. Basie von Solms, Netwerk24, 28 Februarie 2023).
KI-tegnologie

KYK OOK: intelligensie, swartkas-KI, ChatGPT